[thane] - आदिवासी कन्यादान योजना कागदावर

  |   Thanenews

तीन वर्षांत एकाही आदिवासी कन्येला योजनेचा लाभ नाही

म. टा. वृत्तसेवा, ठाणे

गोरगरीब आदिवासींच्या मुलींच्या विवाहासाठी आणि त्या सोहळ्यातील अनुचित प्रथांना आळा घालण्यासाठी दीड दशकापूर्वी राज्य सरकारने आदिवासी कन्यादान योजना सुरू केली. मात्र, या योजनेतील अनुदान लाटण्यासाठी बोगस लाभार्थी घुसविण्याचे प्रकार वाढल्यामुळे गेल्या तीन वर्षांत या योजनेअंतर्गत एकाही आदिवासी कन्येला या योजनेचा लाभ मिळालेला नाही. सामुदायिक विवाह सोहळ्यांमधील विवाहांना अनुदान देणे सरकारने बंद केले होते तर वैयक्तिक स्तरावर आदिवासी या योजनेसाठी अर्जच करत नाही. यंदा काही अटी शिथिल केल्या आहेत. त्यानंतरही यंदा ५० लाभार्थ्यांसाठी ५ लाखांची तरतूद असताना जेमतेम २० लाभार्थी आदिवासी विकास विभागाला मिळाले आहेत.

या योजनेअंतर्गत पूर्वी सामूहिक विवाह सोहळ्यातील प्रत्येक वधूला १० ग्रॅमचे मंगळसूत्र आणि संसारोपयोगी भांडी दिली जात होती. मात्र. त्यात घोटाळे उघडकीस आल्यानंतर दहा हजार रुपयांचे अनुदान थेट नवदाम्पत्यांच्या बँक खात्यावर जमा करण्याची पद्धत सुरू झाली. ज्या संस्था सामूहिक विवाह सोहळ्यांसाठी पुढाकार घ्यायच्या त्यांनाही दहा हजारांचे अनुदान दिले जात होते. ठाणे जिल्ह्यात एकात्मिक आदिवासी विकास प्रकल्पा अंतर्गत २००९ ते २०१५ या कालावधीत २ हजार ५६६ लाभार्थ्यांना २ कोटी ५६ लाखांचे वाटप करण्यात आले होते. परंतु, त्यात अनेक गैरव्यवहार उघड झाल्याने सामुदायिक विवाह सोहळ्यांना अनुदान देण्याची पद्धत बंद करण्यात आली. त्यामुळे २०१५ ते २०१८ या तीन वर्षांत एकाही अदिवासी दाम्पत्याला या कन्यादान योजनेचा लाभ मिळू शकला नव्हता. त्यावर्षी केलेली ३० लाखांचा निधीही बुडाला होता. यंदा त्याची पुनरावृत्ती होऊ नये म्हणून नियम थोडे शिथिल करण्यात आले होते. मात्र, या विभागातील अधिकाऱ्यांनी केलेल्या चौकशीअंती केवळ २० आदिवासी दाम्पत्यांनाच योजनेचा लाभ मिळू शकला आहे. जाहिरात देऊनही या योजनेसाठी संस्थांकडून कोणताच प्रतिसाद मिळत नाही. तसेच बोगस लाभार्थी असल्याच्या घटनाही उघडकीस आल्यामुळेही परिस्थिती ओढावल्याचे शहापूर येथील एकात्मिक आदिवासी विकास प्रकल्प विभागातील अधिकाऱ्यांनी सांगितले.

येथे संपूर्ण कथा वाचा— - http://v.duta.us/LSs9AQAA

📲 Get Thane News on Whatsapp 💬