[navi-mumbai] - कागदी पिशव्यांतून साकारली शिवप्रतिमा

  |   Navi-Mumbainews

म. टा. वृत्तसेवा, नवी मुंबई

राज्यात प्लास्टिकबंदी लागू झाल्यानंतरही प्लास्टिक पिशव्यांचा वापर काही थांबलेला नाही. तो थांबावा आणि कागदी पिशव्यांचा वापर लोकांनी अधिकाधिक करावा, हा संदेश देण्यासाठी कोपरखैरणे येथील आबासाहेब शेवाळे या कलाकाराने दोन हजार ५२ कागदी पिशव्यांनी छत्रपती शिवाजी महाराजांची प्रतिमा साकारली. या प्रतिमेने विश्वविक्रम नोंदवला. जगातील सर्वात मोठी कागदी पिशव्यांमधून साकारलेली प्रतिमा म्हणून युनिक वर्ल्ड रिकॉर्डमध्ये त्याची नोंद झाली. त्याचे प्रमाणपत्र आणि पदकही शेवाळे यांना प्रदान करण्यात आले आहे. त्याच्या या अनोख्या कलेचे सर्वत्र कौतुक होत आहे.

आबासाहेब शेवाळे हे अॅनिमेशन डिझायनर आहेत. काही तरी वेगळे करण्याचा नेहमीच त्यांचा प्रयत्न असतो. याच पार्श्वभूमीवर त्यांनी २ हजार ५२ कागदी पिशव्यांच्या साह्याने छत्रपती शिवाजी महाराजांची १३ बाय १८ आकाराची प्रतिमा साकारली. या साठी त्यांनी वेगवेगळ्या रंगाच्या ४ बाय ४ या आकाराच्या कागदी पिशव्यांचा वापर केला. या पिशव्याही त्यांनी स्वतःच तयार केल्या होत्या. आणि त्यातून ही प्रतिमा साकारली होती. याच बरोबर इंडिया बुक ऑफ रिकॉर्डमध्येही १०० जणांच्या यादीत या प्रतिमेची नोंद झाली आहे. नागरिकांनी प्लास्टिक बॅग वापरू नये, या साठी त्यांनी अनेक कागदी आणि कापडी पिशव्यांचे वाटपही केले आहे. या पूर्वी त्यांनी विराट कोहलीची दिव्यापासून प्रतिमा साकारली होती. त्याचीही लिम्का बुक ऑफ रिकॉर्डमध्ये नोंद झाली आहे. त्याचबरोबर सॉफ्ट बोर्ड पिनच्या साह्याने त्यांनी ३४ वेगवेगळे पोर्टरेट साकारले होते. त्याचीही नोंद लिम्का बुक ऑफ रिकॉर्डमध्ये झाली आहे.

फोटो - http://v.duta.us/RSGGkgAA

येथे संपूर्ण कथा वाचा— - http://v.duta.us/YO5wOQAA

📲 Get Navi-mumbai News on Whatsapp 💬