[pune] - नागफणी पॉइंटवरून दोघे दरीत पडले

  |   Punenews

म. टा. वृत्तसेवा, राजगुरुनगर

भीमाशंकर येथील ‘नागफणी पॉइंट’वरून अज्ञात जोडप्याचा सुमारे पाचशे फूट दरीत पडून मृत्यू झाला. सोमवारी (४ मार्च) दुपारी चारच्या सुमारास ही घटना उघडकीस आली. महाशिवरात्र असल्यामुळे भीमाशंकर येथे भाविकांची गर्दी होती. तेथे पोलिसांचा मोठा बंदोबस्त होता. या वेळी दुपारी ‘नागफणी पॉइंट’वरून एक तरुण आणि तरुणी ५०० फूट दरीत कोसळले असल्याचा फोन पोलिस नियंत्रण कक्षाला आला. याबाबत खेडचे पोलिस निरीक्षक अरविंद चौधरी कर्मचाऱ्यांसह ‘नागफणी पॉइंट’वर गेले. दुर्बिणीद्वारे त्यांनी पाहिले असता एका तरुणीचा मृतदेह दिसून आला. मात्र, दरी पाचशे फूट खोल असल्यामुळे आणि झाडी असल्याने तरुणाचा मृतदेह दिसून आला नाही. मदतकार्यासाठी पोलिस निरीक्षक अरविंद चौधरी यांनी ‘एनडीआरएफ’च्या जवानांना माहिती दिली आहे. घटनास्थळी खेडच्या तहसीलदार सुचित्रा आमले, वन विभागाचे अधिकारी दाखल झाले. अंधार झाल्यामुळे मदतकार्य सुरू करता आले नाही. आज, मंगळवारी सकाळी हे मृतदेह बाहेर काढण्यासाठी प्रयत्न सुरू होणार आहेत, अशी माहिती खेड पोलिसांनी दिली. ही आत्महत्या असावी, असा स्थानिकांचा अंदाज आहे. मृतदेहांची ओळख पटल्याशिवाय आणि अधिक माहिती मिळाल्याशिवाय त्याबाबत बोलता येणार नाही, असे पोलिसांनी स्पष्ट केले.

फोटो - http://v.duta.us/S2-3qwAA

येथे संपूर्ण कथा वाचा— - http://v.duta.us/rzgcNQAA

📲 Get Pune News on Whatsapp 💬