[satara] - साताऱ्याला पावसाने झोडपलेम टा

  |   Sataranews

साताऱ्याला पावसाने झोडपले म. टा. वृत्तसेवा, सातारा सातारा शहर आणि परिसरात शनिवार-रविवार सलग दोन दमदार पाऊस झाला. पूर्ण उन्हाळाभर वळीवाच्या पावसाने हुलकावणी दिली होती. अखेर शनिवारी पहाटे आणि रविवारची उकाड्याने नकोशी झालेली दुपार अचानक आलेल्या टपोऱ्या थेंबांनी अल्हाददायक झाली. रविवारी दुपारी तीनच्या सुमारास सारा आसमंत काळ्या ढगांनी व्यापून गेला होता. दुपारी साडेतीन नंतर टपोऱ्या थेंबांनी जमीन चिंब झाली. वेगाने वाहणार वारे आणि अधून-मधून होणाऱ्या विजेच्या कडकडाटामुळे परिसरातील वीज बंद झाली. त्या नंतर काही क्षणातच उकाड्याने हैराण केलेल्या सातारकरांना पावसाच्या टपोऱ्या थेंबांनी चिंब भिजवून टाकले. येवतेश्‍वरचा बंड्या डोगर, वेगाने वाहणारे वारे, विजांचा कडकडाट, आकाशात दिसणारी काळ्या ढगांची दाटी आणि टपोऱ्या थेंबांचा मारा, असा सुंदर मिलाफ सातारकरांनी अनुभवला. मागील तीन महिन्यांत पाऊसच न झाल्याने सातारकर हैराण झाले होते. मात्र शनिवारी पहाटे आणि रविवारी दुपारी झालेल्या पावसाने तापमानाचा पारा खाली आला आहे. पावसाच्या माऱ्याने काही क्षणातच शहरातील प्रमुख रस्ते ओस पडले. रस्त्यावरून पाणीच पाणी वाहू लागले होते. शहरातील राधिका रोड, देवी चौक, राजवाडा, पालिका परिसरात पाण्याची तळीच निर्माण झाली होती. या पावसाने उन्हाळी भुईमूग काढणीस व्यत्यय आला आहे. अद्यापही अनेक झाडावर असणारे गावठी आंबे वाऱ्याने पडून आंबा शेतकऱ्यांचे नुकसान झाले आहे. ªªªªªªªªªªªªªªªªªªªªªªªªªªªªªªªªªªªªªªªªªªªªªªªªªªªªªªªªªªªªªªªªªªªªª ....... ª वैशाली आगाशे यांची निवड सातारा वैशाली विनायक आगाशे यांची महिला दुहेरी विभागात पोलंड येथे होणाऱ्या जागतिक बॅडमिंटन स्पर्धेसाठी निवड झाली आहे. नुकत्याच गुवाहाटी येथे संपन्न झालेल्या वरिष्ठांच्या बॅडमिंटन निवड चाचणी स्पर्धेत ५० वर्षे वयोगटातील महिला दुहेरी विभागात ही निवड करण्यात आली आहे. या स्पर्धेत आगाशे भारताचे प्रतिनिधीत्व करणार आहेत. पोलंड येथे ४-१२ ऑगस्ट दरम्यान स्पर्धा होणार आहे. वैशाली आगाशे गेली २९ वर्षे भारतीय आयुर्विमा महामंडळात खेळाडू म्हणून कार्यरत आहेत. जागतिक स्पर्धेसाठी पात्र होण्याची त्यांची ही दुसरी वेळ आहे. २०१३ साली टर्की येथे झालेल्या स्पर्धेत त्यांनी महिला दुहेरी आणि मिश्र दुहेरी प्रकारात भारताचे प्रतिनिधीत्व केले होते. .......... शिवसेना दुष्काळी जनतेसोबत असेल : उद्धव ठाकरे सातारा : 'निरा-देवधरच्या पाणी प्रश्‍नाबाबत शिवसेना अन्यायाच्या विरोधात फलटण आणि सोलापूर, सातारा जिल्ह्यातील दुष्काळी जनतेसोबत असेल,' अशी ग्वाही शिवसेना पक्षप्रमुख उद्धव ठाकरे यांनी दिल्याची माहिती खासदार रणजितसिंह नाईक-निंबाळकर यांनी दिली. या वेळी मंत्री सुभाष देसाई यांची उपस्थिती होते. निरा देवधरच्या पाण्यावर सध्या राष्ट्रवादी विरूद्ध भाजप असा संघर्ष सुरू झाला आहे. निरा देवधरचे पाणी बारामतीला देऊन सातारा व सोलापूर जिल्ह्यावर अन्याय केल्याने ते पाणी बंद करण्याची भूमिका माढ्याचे भाजप खासदार रणजितसिंह नाईक-निंबाळकर यांनी शुक्रवारी उद्धव ठाकरे यांची मातोश्रीवर जाऊन भेट घेतली. या वेळी निरा-देवधरच्या पाण्यावर सुमारे अर्धातास चर्चा झाली. पाण्यावरून सोलापूर आणि सातारा जिल्ह्यातील दुष्काळी जनतेवर बारामतीकरांनी कसा अन्याय केला, हे खासदार रणजितसिंह यांनी निदर्शनास आणून दिले. यावर उद्धव ठाकरे यांनी शिवसेना अन्यायाच्या विरोधात आपल्यासोबत आहे. तसेच पाणी प्रश्‍नाबाबतही सोलापूर व सातारा जिल्ह्यातील दुष्काळी जनतेच्या सोबत आम्ही आहोत, असा शब्द दिला. तसेच लवकरच आम्ही दुष्काळी भागाचा दौरा करणार असल्याची माहिती ही ठाकरे यांनी दिल्याचे निंबाळकर म्हणाले. रामराजेंच्या बंगल्यात तोडफोड सातारा महाराष्ट्र विधान परिषदेचे सभापती श्रीमंत रामराजे नाईक-निंबाळकर राहत असलेल्या लक्ष्मी विलास बंगल्यात घुसून खटाव तालुक्यातील एका युवकाने जोरजोराने आरडाओरड करीत अर्वाच्य भाषेत शिवीगाळ करून बंगल्यातील कुंड्यांची तोडफोड केल्यामुळे खळबळ उडाली. या प्रकरणी संशयित युवकावर फलटण शहर पोलिस ठाण्यात गुन्हा दाखल झाला आहे. विजय पांडुरंग मदने (वय ३९, रा. भुषणगड ता. खटाव) असे आरोपी युवकाचे नाव आहे. घटना घडली तेंव्हा बंगल्याच्या आवारात कोणीच नव्हते, त्यामुळे या प्रकरणी सौरभ विनोद कणसे, रा. विद्यानगर फलटण यांनी फिर्याद दिली आहे. संबंधित संशयित आरोपी विजय मदने याला पोलिसांनी अटक केली आहे. दरम्यान संशयित आरोपीने हे कृत्य का केले? या बाबत फलटण पोलिस तपास करीत आहेत. छावणीची पहाणी सातारा : सातारा जिल्ह्यातील माण, खटाव, उत्तर कोरेगाव व फलटण या तालुक्यांमध्ये दुष्काळाची तीव्रता वाढली आहे. यासाठी सरकारने मोठ्या प्रमाणात जनावरांसाठी चारा छावण्या व पिण्याच्या पाण्याची व्यवस्था केली आहे. जिल्हाधिकारी श्‍वेता सिंघल यांनी खटाव तालुक्यातील एनकूळ येथील चारा छावणीस भेट देऊन चारा छावणीतील शेतकऱ्यांशी संवाद साधला. या वेळी प्रांताधिकारी दादासाहेब कांबळे, खटावच्या तहसीलदार अर्चना पाटील, खटावचे पशुवैद्यकीय अधिकारी आदी उपस्थित होते. ......... मटका अड्ड्यावर छापा सातारा : सातारा शहरालगत सातारा तालुका पोलिस ठाण्याच्या हद्दीत पानमळेवाडी (ता. सातारा) या गावी इम्रान बशीर पठाण याच्या मालकीच्या घरात मटका अड्डा चालत असलेची खबर सहाय्यक पोलिस अधिक्षक समीर शेख यांना मिळाली. त्यांनी पथकासह छापा टाकला असता सदर ठिकाणी जुगार अड्डा चालू होता. या ठिकाणी ४ लाख ४६ हजार ८४० रुपयांची रोकड, मोबाइल, दूरदर्शन संच, इनोव्हा कार, असा १७ लाख ३३ हजार ५४० रुपयांचा मुद्देमाल जप्त करण्यात आला. मोहसीन वजीर पठाण, इम्रान बशीर पठाण, कादर बशीर पठाण यांना ताब्यात घेण्यात आले आहे. चालू वर्षातील मटका अड्ड्यावरील ही सर्वांत मोठी कारवाई आहे. तरुणाची आत्महत्या सातारा : रहिमतपूर (ता. कोरेगाव) येथील विनोद किसन निकम या तरुणाने राहत्या घरी अँगलला ओढणीने गळफास घेवून आत्महत्या केली. या बाबतची फिर्याद रणजित शिवाजी माने याने रहिमतपूर पोलिस ठाण्यात दिली. या घटनेची नोंद रहिमतपूर पोलिस ठाण्यात झाली आहे. ......... पाण्यासाठी एल्गार सातारा कायमस्वरूपी दुष्काळी असणाऱ्या माण व खटाव तालुक्यातील काही गावे कोणत्याही पाणी योजनेत समाविष्ट झाली नाहीत. शेतीच्या व पिण्याच्या पाण्यासाठी वणवण भटकणाऱ्या गावांनी आज, सोमवारी खटाव तालुक्यातील विखळे येथे एल्गार परिषदेचे आयोजन केल्याची माहिती संयोजकांनी दिली आहे.

येथे संपूर्ण कथा वाचा— - http://v.duta.us/-uUCagAA

📲 Get Satara News on Whatsapp 💬