[thane] - तेजस्विनी खासगी कंत्राटदाराकडे

  |   Thanenews

५० बस टीएमटीच्या ताफ्यात

म. टा. विशेष प्रतिनिधी, ठाणे

महिला प्रवाशांसाठी जाहीर झालेल्या तेजस्विनी बस योजनेतील ५० बस टीएमटीच्या ताफ्यात दाखल होण्याचा मार्ग दोन वर्षांच्या प्रतीक्षेनंतर अखेर मोकळा झाला आहे. मात्र, या बस जीसीसी तत्त्वावर खासगी कंत्राटदाराच्या माध्यमातून चालविल्या जाणार आहेत. त्यामुळे या बसचे स्टेअरिंग खासगी कंत्राटदाराच्याच हाती असेल, हे स्पष्ट झाले आहे. या बसखरेदीच्या निविदा प्रक्रियेला शुक्रवारी स्थायी समितीच्या बैठकीत मंजुरी देण्यात आली. त्यावेळी विशिष्ट कंपनीच बसखरेदीच्या प्रक्रियेत पात्र ठरेल, अशा पद्धतीने निविदा काढण्यात आल्याचा आरोप सदस्यांच्या वतीने करण्यात आला.

महिला प्रवाशांच्या सुरक्षेसाठी राज्यातील मुंबई, ठाणे, नवी मुंबई, पुणे, नागपूर आणि कल्याण-डोंबिवली या शहरांना प्रत्येकी ५० याप्रमाणे ३०० बस देण्याचा निर्णय केंद्र सरकारने चार वर्षांपूर्वीच जाहीर केला होता. ठाणे महापालिकेच्या २०१६-१७ या आर्थिक वर्षातील अंदाजपत्रकात या बसखरेदीसाठी तरतूद करून त्याला सर्वसाधारण सभेची मान्यताही घेण्यात आली होती. त्यानंतर गेली दोन वर्षे या बस प्रतीक्षेत होत्या. या बसची खरेदी आणि संचलन असा एकूण १४ कोटींचा खर्च अपेक्षित असून त्यापैकी ६ कोटींचे अनुदान सरकारकडून ठाणे महापालिकेला प्राप्त झाले आहे. उर्वरित अनुदानासाठी केंद्र सरकारकडे पत्रव्यवहार करण्यात आल्याची माहिती परिवहन व्यवस्थापक संदीप माळवी यांनी सभागृहात दिली. या बसखरेदीची निविदा प्रक्रिया पूर्ण झाली असून स्थायी समितीच्या मान्यतेनंतर सप्टेंबर महिन्याअखेरीस या बस टीएमटीच्या ताफ्यात दाखल होतील, अशी माहितीसुद्धा त्यांनी दिली. या बस कुणामार्फत चालविल्या जाणार आहेत, असा प्रश्न सभागृह नेते नरेश म्हस्के यांनी उपस्थित केल्यानंतर जीसीसी तत्त्वावर खासगी कंत्राटदारामार्फत त्यांचे संचलन केले जाणार असल्याची माहिती माळवी यांनी दिली. तर, विशिष्ट कंपनीलाच या बसखरेदीचे कंत्राट मिळावे, यासाठी निविदे प्रक्रियेतील अटी-शर्थी ठरविण्यात आल्या होत्या, असा आरोप काँग्रेसचे सदस्य विक्रांत चव्हाण यांनी केला. टीएमटीच्या १९० बस खासगी कंत्राटदाराच्या माध्यमातून जीसीसी तत्त्वावर चालविल्या जात आहेत. त्याच कंत्राटदाराला तेजस्विनीच्या ५० बस चालविण्यास दिल्या जाणार आहेत.

येथे संपूर्ण कथा वाचा— - http://v.duta.us/mXc-5gAA

📲 Get Thane News on Whatsapp 💬