[beed] - मुंदडांच्या पोस्टवरूनराष्ट्रवादीचे चिन्ह गायब

  |   Beednews

उमेदवारी जाहीर केल्यानंतरही पक्ष सोडणार असल्याची चर्चा

म. टा. प्रतिनिधी, बीड

बीड जिल्ह्यात येऊन राष्ट्रवादी काँग्रेस पक्षाचे अध्यक्ष शरद पवार यांनी जिल्ह्यातील पाच विधानसभा मतदारसंघातील उमेदवार जाहीर केले. मात्र, खुद्द शरद पवार यांनी उमेदवारी जाहीर करूनही केजचा उमेदवार पक्षापासून दूर जात असल्याची चर्चा आहे. उमेदवारी जाहीर झालेल्या नमिता मुंदडा यांच्या फेसबुक पोस्टवरून शरद पवार आणि राष्ट्रवादीचे चिन्ह गायब झाल्याने त्यांच्या भाजप प्रवेशाबद्दल चर्चा सुरू झाली आहे.

केज विधानसभा मतदारसंघ दिवंगत माजी आरोग्य मंत्री विमल मुंदडा यांचा मतदारसंघ म्हणून ओळखला जात होता. केज मतदारसंघातून चार वेळा त्या विधानसभेत निवडून गेल्या होत्या. त्यांचे निधन झाल्याने त्यानंतर त्यांच्या सून नमिता मुंदडा यांनी पाच वर्षांपूर्वी राष्ट्रवादीच्या चिन्हावर केज विधानसभेची निवडणूक लढवली होती. मात्र, त्यावेळी त्यांचा पराभव झाला. राष्ट्रवादीतील गटातटाच्या कुरघोडीत मुंदडा कुटुंबीयांची अडचण झाली. केज मतदारसंघातील पदाधिकारी निवडीत मुंदडा गटाला डावलण्यात आले होते. विधान परिषदेतील विरोधी पक्ष धनंजय मुंडे आणि जिल्हाध्यक्ष बजरंग सोनवणे यांनी मुंदडा यांच्याविरोधात मतदारसंघातील पदाधिकारी नेमले. मात्र, विमल मुंदडा यांच्यापासून शरद पवार यांच्याप्रती असलेली निष्ठा मुंदडा कुटुंबीय राष्ट्रवादी काँग्रेसमध्ये कायम होते. लोकसभा निवडणुकीत मुंदडा यांनी बजरंग सोनवणे यांचे काम केले. मात्र, निवडणूक जवळ आल्यावर मात्र काँग्रेस-राष्ट्रवादी काँग्रेस आघाडीत केज मतदारसंघ काँग्रेसला सोडण्याची चर्चा सुरू झाली. काँग्रेसचे एक नेते केजमध्ये भेटीगाठी घेऊ लागले आहेत. त्यामुळे मुंदडा अस्वस्थ होते.चार दिवसांपूर्वी राष्ट्रवादीचे अध्यक्ष शरद पवार बीडला आले. या संवाद दौऱ्यात माजी मंत्री शिवाजीराव पंडित यांच्या शिवछत्र निवासस्थानी त्यांनी प्रत्येक मतदारसंघाविषयी चर्चा केली. या वेळी मुंदडा व मुंडे गटाने एकमेकांविरोधात तक्रारी केल्या. या गटातटाच्या तक्रारी ऐकून घेऊन समजावून सांगत शरद पवार यांनी बीडमध्ये केजसह पाच विधानसभा मतदारसंघांतील उमेदवारांच्या नावांची घोषणा केली. यात केजमधून राष्ट्रवादीकडून नमिता अक्षय मुंदडा यांची घोषणा शरद पवार यांनी केली. मात्र, उमेदवारी जाहीर केल्यानंतर नमिता मुंदडा यांची एक फेसबुक पोस्ट व्हायरल झाली. या पोस्टमधून राष्ट्रवादी काँग्रेसचे अध्यक्ष शरद पवार आणि घड्याळ गायब झाले आहे. या फेसबुक पोस्टमुळे जिल्ह्यात मुंदडा कुटुंबीय पक्षातील विरोधी गटाच्या कुरघोडीला कंटाळून राष्ट्रवादी सोडणार असल्याची चर्चा जोरात सुरू आहे. येत्या काही दिवसांत मुंदडा यांचा भाजपप्रवेश आणि केजमधून उमेदवारी जाहीर होणार असल्याची चर्चा बीड जिल्ह्यात सुरू आहे.

येथे संपूर्ण कथा वाचा— - http://v.duta.us/2szIhAAA

📲 Get Beed News on Whatsapp 💬